सिनेमा संसार
काठमाडौं
नमूना कलेज अफ फेसन टेक्नोलजीको १९औं ग्रेजुएशन फेसन शो अनुकल्पित प्रभानम् एक अविस्मरणीय साँझका रूपमा सम्पन्न भएको छ।
ललितपुरको झम्सीखेलस्थित द प्लाजा नेपाल मा शुक्रबारको यो विशेष साँझ न केवल एउटा फेसन शो थियो, बरु नेपाली कला, संस्कृति, र आधुनिकताको संगमको एक भव्य उत्सवजस्तै प्रतीत भयो। ८८ स्नातक विद्यार्थी डिजाइनरको सिर्जनात्मक संसारलाई उजागर गर्ने यो शोमा नौवटा विशिष्ट संग्रह प्रस्तुत गरिए। यी संग्रहले फेशन डिजाइन मात्र होइन, डिजाइनरहरूको दृष्टिकोण, मौलिकता, र सांस्कृतिक पहिचानलाई समेटेका थिए। हरेक परिधान एक कथा थियो—नेपाली परम्परागत कलाको पुनव्र्याख्या, आधुनिक फेसनको नयापन, र हाम्रा मौलिक जडित मूल्यहरूको सौन्दर्य।
नमूना कलेजका संस्थापक प्रिन्सिपल श्रीमती ज्ञानी शोभा तुलाधरको रनवे उपस्थितिसँगै प्रारम्भ भएको अनुकल्पित प्रभानम् शीर्षको फेसन कार्यक्रम ३६ जना मोडलको मनमोहक प्रस्तुतिमा सम्पन्न भएको थियो। शोको विशेष आकर्षण भनेको प्रत्येक डिजाइनरद्वारा प्रस्तुत गरिएका मास्टरपिस थिए। यी पहिरनले नेपाली संस्कृति, परम्परा र भावनालाई अनूठो ढंगले प्रस्तुत गरे।
परम्परागत हातकलाका नमूनाहरूलाई समकालीन सिल्हुटहरूसँग मिश्रण गर्दै, यी डिजाइनरले फेसनलाई सिर्जनात्मकता र भावनाको क्यानभासमा उतारेका थिए। रनवेमा हरेक मोडमा नेपाली सौन्दर्य, कलात्मक दृष्टिकोण, र नवाचारको समिश्रण देख्न पाइन्थ्यो। शोको सञ्चालनमा ३६ जना मोडलहरूको प्रस्तुति रह्यो, जसले डिजाइनरहरूको सिर्जनात्मक परिकल्पनालाई जीवन्त बनाए। कार्यक्रमको कोरियोग्राफी र निर्देशन संचारकर्मी तथा फेसन कोरियोग्राफर रोजिन शाक्य द्वारा गरिएको थियो, भने फेसन शोको सम्पूर्ण आयोजन, व्यवस्थापन, र समन्वय १९औं ब्याचका विद्यार्थीहरू आफैंले गरेका थिए। नेतृत्वदायी भूमिकामा प्रिशा जोशी, अनिमा श्रेष्ठ, सनिशा बलामी, प्रियांशी खेतान, भरोसा गौतम, तथा निशान्त चापागाईं रहेका थिए।
