CINEMANEWS

अभिमन्यु : च्याप्टर–१ को नयाँ गीत ‘लड्की गोरी’ सार्वजनिक

सिनेमा संसार
काठमाडौं

आगामी भदौ २७ गते रिलिज हुन लागेको सिनेमा अभिमन्यु : च्याप्टर–१ ले नयाँ गीत लड्की गोरी सार्वजनिक गरेको छ। भोजपुरी लवजमा भए पनि नेपाली भाषामा प्रस्तुत गरिएको यो गीतमा शब्द, संगीत र स्वर प्रशान्त शिवाकोटी र प्रेरणा सिंहले दिएका छन् भने संगीत संयोजन विषम आचार्यको रहेको छ। गीतमा चर्चित नर्तकी जुना सुन्दासले आकर्षक आइटम डान्स प्रस्तुत गरेकी छिन्, जसको कोरियोग्राफी रोहन विश्वकर्माले गरेका हुन्।

भिडियोमा युवायुवतीबीचको आकर्षण, रमाइलोपन र नृत्यलाई प्रस्तुत गरिएको छ। तराईको जीवनशैली र संस्कृतिलाई कथामा उतारिएको यस गीतले दुई दिनमै १० लाखभन्दा बढी दर्शक पाएको छ। छोटो समयमा गीतले पाएको लोकप्रियताले सिनेमा प्रति उत्सुकता अझ बढाएको निर्माण पक्षको दाबी छ।

यसअघि सार्वजनिक गरिएको गीत मालीमा दाजु–बहिनीबीचको आत्मीय सम्बन्धलाई भावुक धुन र शब्दमार्फत प्रस्तुत गरिएको थियो। उक्त गीतमा पनि प्रशान्त शिवाकोटीको शब्द, संगीत र स्वर तथा विषम आचार्यको संगीत संयोजन रहेको थियो। सो गीतमाथि निर्माण पक्षले भिडियो प्रतिस्पर्धा घोषणा गर्दै उत्कृष्ट ३ भिडियोलाई क्रमशः ५०, ३० र १५ हजार रुपैयाँ पुरस्कार दिने जनाएको छ।

सिनेमा अभिमन्यु : च्याप्टर–१ पैसाको प्रलोभनमा फसेको र त्यहाँबाट उम्किन संघर्ष गर्ने पात्रको कथा केन्द्रीत छ। यसको हिन्दी संस्करण असोज ६ गते वर्ल्डवाइड रिलिज हुनेछ। निर्माता विनोद पौडेलका अनुसार हिन्दी संस्करणलाई विशेष तयारीसहित अन्तर्राष्ट्रिय बजारमा प्रस्तुत गरिनेछ।

सिनेमामा कामेश्वर चौरासिया, सरिता गिरी, गौमाया गुरुङ, लक्ष्मी बर्देबा, शिशिर वाङ्देल, किरण श्रेष्ठ, प्रकाश दाहाल र सुष्मा निरौलालगायत कलाकारको अभिनय रहेको छ। सेभेन सिज सिनेमाजको ब्यानरमा विनोद पौडेल र गुञ्जन गिरीद्वारा निर्माण भएको यस सिनेमालाई सुशान्त गौतमले निर्देशन गरेका हुन्। यो उनको निर्देशन डेब्यु पनि हो। लेखन मुकेश खनाल, क्रिएटिभ निर्देशक मदन थापा, सह–निर्माता रमेश चौलागाई र हरि श्रेष्ठ तथा कार्यकारी निर्माता विशाल लामा, हरि मोक्तान, कृष्ण भट्टराई, नीराजन लुईंटेल र सन्देश श्रेष्ठ रहेका छन्। लाइन प्रोड्युसर जीवन शाक्य हुन्।

Related Articles

Leave a Reply

Your email address will not be published. Required fields are marked *

Back to top button