सिनेमा संसार
काठमाडौं

नेपाली फिल्म ‘जेरी अन टप’ असोज ३१ गते अर्थात् अक्टोबर १७ मा प्रदर्शनमा आउने भएको छ। बिहीबार सार्वजनिक गरिएको पोस्टरसँगै निर्माता समूहले फिल्मको रिलिज मिति सार्वजनिक गरेको हो।फिल्ममा अनमोल केसी, जसिता गुरुङ र आँचल शर्माबीचको प्रेम त्रिकोण प्रस्तुत गरिएको छ। सार्वजनिक पोस्टरहरूमा पनि ती पात्रहरूबीचको सम्बन्धको झलक देख्न सकिन्छ। दुई पोस्टरमा अनमोल र जसिता देखिएका छन् भने अर्कोमा अनमोल र आँचल एकसाथ देखिन्छन्।

कथावस्तु प्रेम र यात्रासँग जोडिएको छ। फिल्ममा पदयात्राको दौरानमा हुने सम्बन्ध, प्रेम र भावनात्मक उतारचढाव प्रस्तुत गरिएको छ। छायांकन सगरमाथा क्षेत्र, मुस्ताङ र काठमाडौंमा गरिएको छ, जसले कथालाई भौगोलिक विविधता दिएको छ।फिल्मको निर्देशन सुयोग गुरुङले गरेका हुन् भने कथा हेमराज बीसीले लेखेका हुन्। निर्माता रोविन शेरचन, रामकृष्ण श्रेष्ठ र दीपक भण्डारी हुन्। फिल्म सरोज न्यौपानेको प्रस्तुति हो।अनमोल, जसिता र आँचलसँगै फिल्ममा भुवन केसी, उषा खड्गी र केदार घिमिरे (माग्ने बुढा) को अभिनय पनि रहनेछ।जेरी अन टप’ प्रेम र साहसिकताको मिश्रण भएको युवा लक्षित रोमान्टिक फिल्मका रूपमा प्रस्तुत गरिएको छ।