सिनेमा संसार
काठमाडौं
चीनले दक्षिण कोरियाली फिल्म, के-पप, र टिभी श्रृंखलामाथि लगाएको अघोषित प्रतिबन्ध हटाउने तयारी गरिरहेको छ। डेडलाइन म्यागेजिनका अनुसार सम्भवतः मे महिनादेखि यसको थालनी हुनेछ।
समाचार अनुसार, प्रतिबन्ध खुकुलो पार्नु चीनको ‘वुल्फ वारिअर’ कूटनीतिक नीतिबाट ‘स्माइल पोलिसी’तर्फ सर्ने संकेत हो, जसले चीनविरुद्धको विश्वव्यापी भावना कम गर्न मद्दत गर्नेछ। यसलाई अमेरिकी राष्ट्रपति डोनाल्ड ट्रम्प प्रशासनको अस्थिर नीतिहरूप्रतिको चीनको प्रतिक्रियाका रूपमा पनि हेरिएको छ। ट्रम्पले विभिन्न राष्ट्रमाथि ट्यारिफ लगाउने धम्की दिइरहेका छन्, यद्यपि चीनप्रतिको उनको धारणा अझै स्पष्ट छैन।सन् २०१६ मा अमेरिकी थाड मिसाइल प्रणाली दक्षिण कोरियामा तैनाथ गरेपछि चीनले कोरियाली संगीत, चलचित्र, नाटक, खेल लगायत पप संस्कृतिमा कडाइ गरेको थियो। यद्यपि चीनले औपचारिक रूपमा प्रतिबन्ध लगाएको स्वीकार गरेको छैन। कोरियाली फिल्म र नाटकहरू चिनियाँ हल वा स्ट्रिमिङ प्लेटफर्ममा न्यून मात्रामा रिलिज भएका छन्, भने के-पप कलाकारलाई चीनमा प्रस्तुति दिन दिइएको छैन।कोरियाली अर्थतन्त्रमा यस प्रतिबन्धको ठूलो प्रभाव परेको छ। केडीबी फ्युचर स्ट्राटेजी रिसर्च इन्स्टिच्युटका अनुसार, सन् २०१७ मा कोरियाली मनोरञ्जन उद्योगलाई १५.३ बिलियन अमेरिकी डलर बराबरको नोक्सान भएको थियो।
