सिनेमा संसार
काठमाडौं
गायिका एलिना चौहानले श्रीमान तथा गायक विष्णु सापकोटासंग सम्बन्धविच्छेदको मुद्दा टुंगो लागेसँगै फेसबुकमा स्टाटस लेख्दै भावनात्मक मिलन, आपसी विश्वास र समझदारी नहुँदा सम्बन्धमा अल्पायूमै पूर्णविराम लागेको बताएकी छन्। साथै उनले यो रहर नभइ बाध्यता भएको समेत उल्लेख गर्दै विष्णुलाई बाँकी जीवनको शुभकामना समेत दिएकी छन्।
एलिना सामाजिक सञ्जाल फेसबुकमा लेख्छिन्
प्रिय विष्णु
अग्निलाई साक्षी राखेर ७ फेरा लगाउदा गलेका खुट्टाहरू अझै उस्तै छन्। तिम्रो हातले रंगिएको मेरो सिउँदो अनि सिन्दुरका डोबहरू अझै उस्तै छन्। तिम्रा नाममा लगाएका हातभरिका चुरा अनि छिनछिन आवाज अझै उस्तै छन्।
हामीलाई दुईबाट एक बनाएको सेतो लगनको गाँठो अझै उस्तै छ। वडा कार्यालयमा गएर बनाएको हाम्रो विवाहदर्ताको प्रमाणपत्र अझै उस्तै नयाँ छ। तर फेरा, चुरा, सिन्दुर, लगनगाँठो, विवाहदर्ता र शारीरिक मिलन मात्रै विवाह होइन रहेछ। भावनात्मक मिलन, आपसी विश्वास र समझदारी नै विवाहको मुख्य प्राण रहेछ। जुन रहेन अनि हाम्रो सम्बन्धमा अल्पायु मै पूर्णविराम लागेको छ। यो रहरले होइन। जुन बाध्यता तिमी, मलाई र भगवानलाई मात्र थाहा छ।आजदेखी स्वतन्त्र भएर कानुनी रुपमै आ–आफ्नो गन्तव्य तय गर्न बाटो खुलेको छ। पत्नीका रुपमा अधिकारले मैले पाउने सम्पत्ति तिम्रै प्रगति र उन्नतिका लागि छोडेको छु। तिमीलाई बा“की जीवनको धेरै–धेरै शुभकामना विष्णु ।
