सिनेमा संसार
काठमाडौं
लोकप्रिय अभिनेत्री जल शाहकी छोरी कलशले काभे्रको एक गाउँका ५५ विपन्न विद्यार्थीलाई सहयोग गरेकी छिन्।
१६ वर्षीया कलशले आफ्नो पकेट मनी र पार्टटाइम कामबाट संकलित रकममार्फत काभ्रेको चौरी देउराली गाउँपालिकाका चार विद्यालयमा अध्ययनरत विद्यार्थीलाई जाडोका लत्ताकपडा, शैक्षिक सामग्री, स्यानिटरी प्याड, हर्लिक्ससहितका खाद्य सामग्री उपलब्ध गराएकी हुन्। साथै, दुई जना विद्यार्थी करिश्मा मगराती र युनिक कोइरालाको वार्षिक विद्यालय शुल्कस्वरूप जनही ३५ हजारका दरले ७० हजार रुपियाँ सहयोग गरेकी छन्।
सानैदेखि समाजसेवामा रुचि राख्ने कलशले शिक्षा फाउन्डेशन आरम्भ गरी विपन्न विद्यार्थीलाई सहयोग गर्न थालेकी हुन्। सहयोग कार्यक्रममा उनले भनिन्, ‘विद्यार्थीहरूलाई भेटेर सहयोग गर्न पाउँदा निकै खुसी लागेको छ। आगामी दिनमा पनि यस्ता कार्यलाई निरन्तरता दिनेछु, मलाई सबैले आशिर्वाद र हौसला दिनुहोला।
अभिनेत्री जल शाहले छोरीको समाजसेवाप्रति गर्व व्यक्त गर्दै कलशको इच्छालाई पूर्णरूपमा साथ दिने बताइन्।
कलशद्वारा प्रदान गरिएको सहयोग सामग्री पाउँदा विद्यार्थी निकै खुसी भएका थिए। उनीहरूले गीत गाएर कार्यक्रमलाई रमाइलो बनाएका थिए। सञ्चारकर्मी उत्सव रसाइलीले आफ्नै जन्मगाउँमा जल शाह र उनकी छोरीको उपस्थिति रहनु गर्वको विषय भएको बताए।
