सिनेमा संसार
काठमाडौं
बलिउडमा धेरै दिदी–भाइ वा दिदीबहिनीले अभिनयको क्षेत्र रोजेका छन्। तर, एउटाको करिअर शिखरमा पुगेको छ भने अर्कोले त्यति सफलता हात पाउन सकेका छैनन्। शमिता शेट्टी र शिल्पा शेट्टीको करिअर ग्राफ पनि केही त्यस्तै छ। शमितालाई दिदी शिल्पाजस्तो ख्याति मिलेन। साथै उनी दिदीसँग प्रायः तुलना हुने गरेको छ। हालै यसै विषयमा शमिता खुलेर बोलेकी छन्।पिंकभिलासँगको कुराकानीमा शमिताले आफू कसरी शिल्पासँग हुने तुलना सामना गर्ने गर्छिन् भन्ने बताइन्। उनी भन्छिन्, ‘मेरो दिदी निकै सरल छिन्, बिल्कुल गाईजस्तै, भने म भने बच्चाले गर्ने हर्कत गर्ने खालकी। आफूलाई चिन्नु, एक्सप्लोर गर्नु सजिलो हुँदैन। अनुभवले मात्र सम्भव हुन्छ। सुरुमा कतिपय कुरा मलाई राम्रो लाग्दैनथ्यो, मनमा उथलपुथल हुन्थ्यो, के बन्ने भन्ने थाहा थिएन।’ उनी बाल्यकालमा यसै उल्झनमा थिइन्। अहिले भने अवस्था बदलिएको छ। उनी आफ्नै बलबुतामा अघि बढेकी छिन्, आत्मविश्वास बढेको छ र के बन्ने भन्नेमा स्पष्ट भएकी छिन्। त्यसैले अब तुलना हुनुले उनलाई असर गर्दैन।शमिता शेट्टी अगाडि भन्छिन्, ‘हरेक व्यक्तित्व फरक हुन्छ। यो कुरा दिदीबहिनी वा दाजुभाइसँग मात्र होइन। एउटै घरमा रहेका दुई जना पनि एकदमै विपरीत हुन सक्छन्। शिल्पा र मसँग पनि यही हो। हाम्रा आफ्ना-आफ्नै विशेषताहरू छन्।’ शमिताको विश्वास छ कि दुई जनाको तुलना गर्नु बेवकूफी हो।हालै शमिता र शिल्पा दुवैलाई कपिल शर्माको कमेडी शोमा सँगै देखियो, जहाँ उनीहरूले बाल्यकालका अनुभव बाँडेका थिए। सन् २०२३ मा शमिता ‘टेनेन्ट’ सिनेमामा देखिएकी थिइन्। अहिले उनी सामाजिक सञ्जालमा निकै सक्रिय छिन्।
