सिनेमा संसार
काठमाडौं
हालसम्मै सर्वाधिक कमाई गरेर इतिहास रच्न सफल सिनेमा पूर्णबहादुरको सारंगीमा विजय बरालले दमदार अभिनयमार्फत दर्शकको मन जितेका थिए। अब उनी नयाँ सिनेमा जनै हराएको मान्छेः सम्बन्धका धागाहरूमा मुख्य भूमिकामा फर्किँदै छन्। सिनेमा भदौ ६ गतेदेखि देशव्यापी प्रदर्शनको यात्रा सुरु गर्नेछ।
निर्देशक हिमाल न्यौपानेका अनुसार, सिनेमा गाउँको परिवेशमा बुनेको पारिवारिक र इमोशनल कथा हो। गरिबी, सम्बन्ध र पारिवारिक उतारचढावका विषयलाई समेटेको यो कथा नेपाली दर्शकको मनमा छिर्ने विश्वास उनले व्यक्त गरेका छन्। विजय बराल पनि आशावादी छन्, ‘कथा हाम्रो समाजको हो, त्यसैले दर्शकले आफ्नै जीवन देख्नेछन्’ भन्छन्।
सिनेमामा असोसिएट निर्देशक प्रेमगीत ३ का अभिनेता मनिष राउत रहेका छन्, जसले यसै सिनेमा मार्फत निर्देशनमा पाइला चाल्दैछन्। कलाकार सूचीमा विजय बरालसँगै मिरुना मगर, केकी अधिकारी, सुशांक मैनाली, गौरव पहाडी, भोलाराज सापकोटा, रियर राई, तारा शर्मा, भावना खपांगी मगर, रुपेश लामा, सुमन थापालगायतले अभिनय गरेका छन्। पेपरक्लिपको ब्यानरमा कमल न्यौपाने र विमल न्यौपानेद्वारा निर्माण गरिएको सिनेमा हो।
सिनेमाको कथा, पटकथा र संवाद भानुभक्त ढकालले तयार गरेका छन् भने संगीत थानेश्वर गौतम, अर्जुन पोखरेल, एसडी योगी र प्रसान्त सिवाकोटीले दिएका छन्। छायांकन (डीओपी) नवीन गुरुङ, फिल्मटोग्राफी कृष्ण परियार र कार्यकारी निर्माता नारायण तिमिसिना, चुडामणि सिवाकोटी, आरके मानन्धर, सिआर बस्नेत, फिलिप डिसी र जेम्स महाराजन रहेका छन्।
सिनेमा ट्रेलरले जीवनको यथार्थ पस्केको छ। मुख्य पात्र विजयले बाबुको ऋण चुक्ता गर्ने र परिवारलाई पक्का घरमा बसाल्ने सपना बोकेर कोरिया जान खोज्दा काठमाडौंमै अड्किन्छन्। सपना पूरा गर्न अरूको बन्धक बन्न बाध्य हुने उनको संघर्ष, भेटिने मिरुना मगरसंगको प्रेम, र केकी अधिकारीको वैवाहिक पीडा जस्ता भावनात्मक दृश्यले ट्रेलरलाई जीवन्त बनाएको छ। निर्माण पक्षको विश्वास छ—निम्नमध्यम वर्गीय आम नेपालीको कथा बोकेको सिनेमा गाउँको गन्ध, जीवनको स्वाद र सम्बन्धको तातोपनासहित दर्शकको मन छुनेछ।
