
सिनेमा संसार
काठमाडौं
लोकप्रिय गायक पशुपति शर्मा सवार कार स्याङ्जामा दुर्घटना भएको छ। बुधबार दिउँसो सिद्धार्थ राजमार्गअन्तर्गत भीरकोट नगरपालिका–२ मा ग १ च ४१७१ नम्बरको कार अनियन्त्रित भई कल्भर्टमा ठोक्किँदा दुर्घटना भएको हो।
दुर्घटनामा गायक शर्मासहित सवार चार जना यात्रुहरू सामान्यरूपमा घाइते भएका छन्।
जिल्ला प्रहरी कार्यालय स्याङ्जाका डिएसपी बाबुराम न्यौपानेका अनुसार दुर्घटनामा गायक शर्माको देब्रे हातको कान्छी औंला भाँचिएको छ। अन्य यात्रुहरूलाई भने गम्भीर चोट नलागेको र सबैको अवस्था सामान्य रहेको प्रहरीले जनाएको छ।
गाडीमा सामान्य क्षति पुगेको बताइएको छ। गायक शर्मा सांगीतिक कार्यक्रममा सहभागी हुन स्याङ्जा गएका थिए।
प्रहरीले घटनाको थप अनुसन्धान गरिरहेको जनाएको छ।