सिनेमा संसार
काठमाडौं
लोकप्रिय सांगीतिक ब्यान्ड मंगोलियन हार्टले पहिलोपटक न्युजिल्यान्डमा कन्सर्ट दिने भएको छ। ब्यान्डले विशेष टुरअन्तर्गत न्युजिल्यान्डका तीन प्रमुख सहर क्राइस्टचर्च, अकल्यान्ड र टाउरंगामा प्रत्यक्ष सांगीतिक प्रस्तुति दिने भएको हो। टुरलाई भव्य बनाउन तयारी गरिरहेको ब्यान्डका म्यानेजर तथा गितारिस्ट बोबी लामाले बताएका छन्।
उनका अनुसार बादलपारिको देशबाट, मेरो नेपाल, सुम्निमा, म माया लाउँदिन, हल्ला चलेछ, तिमीलाई देखेर, पर्खाइमा, सायद तिम्रो बाटोमा, उभो उभो खासा, सैलुङे मेलाजस्ता गीत कन्सर्टमा प्रस्तुत गरिनेछ। कन्सर्टका लागि ब्यान्डको आठ सदस्यीय टोली न्युजिल्यान्ड पुगिसकेको छ।
टोली आगामी अगस्ट १५ मा नेपाल फर्किनेछ र त्यसपछि अगस्ट २० मा मिजोरम, उत्तर–पूर्व भारतमा आप्mनो प्रस्तुति दिनेछ। गायक राजु लामा लिड भोकलिस्ट रहेको ब्यान्डमा बोबी लामा रिदम गिटार, भूपेन्द्र बज्राचार्य लिड गिटार, सन्तोष थापा ड्रम, विनय महर्जन बासुरी, बाबुराजा महर्जन परकसन (मादल), पवन कपाली बास गिटार र निरेन्द्र रञ्जित साउन्ड इन्जिनियर रहेका छन्। टुरको आयोजना स्थानीय इभेन्ट कम्पनी सम्बन्ध इभेन्ट्सले गरेको हो।
