सिनेमा संसार
काठमाडौं
लैङ्गिक अल्पसंख्यक पारालैंगिक पात्र (ट्रान्सवुमन) को कथामा बनेको सिनेमा गुन्यु चोलो : द ड्रेस को गीत ‘म फूल हुँ कि काँडा’ ललितपुरमा आयोजित एक कार्यक्रमका बीच सार्वजनिक गरिएको छ।
गीतमा लेखु सहयात्रीको शब्द र संगीत रहेको छ भने स्वर मनीषा पोखरेलको रहेको छ। गीतमा प्रेमभाव र स्वीकार्यताको गहिरो अनुभूति प्रस्तुत गरिएको छ—जहाँ आफूभित्र प्रेम गर्ने मन भए पनि त्यो प्रेम साँचो हो भने प्रमाण दिन आग्रह गरिएको छ।गीतको भिडियोमा नाजिर हुसेनले महिला भेषमा नृत्य प्रस्तुत गरेका छन्। उनले गेस्चर र पोस्चरमा विशेष मेहनत गरेका छन् भने भिडियोमा सुशील सिटौलाको पनि अभिनय देख्न सकिन्छ।
सिनेमा गुन्यु चोलो : द ड्रेस आगामी भदौ १३ गते रिलिज हुने तयारीमा छ। सिनेमा को निर्देशन समुन्द्र भट्टले गरेकी हुन्। नाजिर हुसेनले सिनेमा मा पारालैंगिक महिला (ट्रान्सवुमन) को मुख्य भूमिका निर्वाह गरेका छन्। साथै, सञ्चिता लुईंटेल, सुशील सिटौला, राजकुमार घोष, शिशिर राणा, अनुपम श्रेष्ठ, विशाल पहारीलगायत कलाकारहरूको अभिनय रहेको छ।
निर्देशकका अनुसार, यो सिनेमा नेपालमा पहिलो पटक पूर्ण रूपमा ट्रान्स स्टोरीमा आधारित छ।सिनेमा को अन्तर्राष्ट्रिय वितरण अधिकार अमेरिकाको बफेलो एट्ले ले खरिद गरेको छ। सम्पूर्ण पोस्ट–प्रोडक्सन काम विदेशमा सम्पन्न गरिएको छ—जहाँ एडिटिङ, कलर ग्रेडिङ, साउन्ड मिक्सिङ र ब्याकग्राउन्ड म्युजिक समेत हलिउड शैलीमा तयार पारिएको छ।
सिनेमा मा हलिउडकी चर्चित गायिका लिजा जेरार्डले स्वर दिएकी छिन्, जो ग्ल्याडिएटर २ मा पनि प्रस्तुत छिन्। ब्याकग्राउन्ड म्युजिक मार्सेलो दी फ्रान्सिसीले कम्पोज गरेका छन्।
यो सिनेमा नेपाली र हलिउड प्रोडक्सन हाउसको संयुक्त कोल्याबोरेसनमा निर्माण भएको हो। आकाश बुढाथोकी र भि–भन्से जानुबोन निर्माताका रूपमा रहेका छन् भने जेफ्री जे वेन र स्टिभ जोन्स्टन कार्यकारी निर्माता र अनुपम श्रेष्ठ सहयोगी निर्माता रहेका छन्।सिनेमाको गीत रचना लेखु सहयात्रीको, छायांकन आलोक शुक्लाको रहेको छ।
