सिनेमा संसार
काठमाडौं
चलचित्र विकास बोर्डअन्र्तगतको चलचित्रकर्मी कल्याणकारी कोषले पहिलोपटक बाढी प्रभावित सिनेमाकर्मीलाई सहयोग प्रदान गरेको छ।
सिने बोर्डका अध्यक्ष दिनेश डीसी र कोषकी अध्यक्ष बसुन्धरा भुसालले प्रत्येक पीडित सिनेमाकर्मीलाई ४५ हजार रुपियाँ बराबरको दरले राहत प्रदान गरेका हुन्। विगतमा गम्भीर रोगी तथा आर्थिक रूपमा कमजोर सिनेमाकर्मीलाई मात्र सहयोग गर्दै आएको कोषले यसपटक प्राकृतिक प्रकोपबाट प्रभावित सिनेमाकर्मीलाई पनि आर्थिक सहयोग शुरु गरेको हो।
यस योजनाअन्तर्गत नेपाल चलचित्र कलाकार संघ, नेपाल चलचित्र प्राविधिक संघ, र नेपाल चलचित्र द्वन्द्व कलाकार संघका सदस्यहरू यादव सिटौला, शिवप्रसाद चोलागाईं, सन्तु तामाङ, कुल प्रसाद हुमागाईं, गोकुल हुमागाईं, ज्ञान बहादुर तामाङ, र फणिन्द्र बहादुर विकलाई आर्थिक सहयोग प्रदान गरिएको हो।
बोर्डका अध्यक्ष दिनेश डीसीले सिनेमाकर्मीको हितका लागि बोर्ड निरन्तर क्रियाशील रहने बताए। कोषकी अध्यक्ष बसुन्धरा भुसालले राहत वितरण कार्यक्रमलाई निरन्तरता दिने प्रतिबद्धता जनाउँदैसनेमा क्षेत्रका श्रमिकहरूको सुरक्षाका लागि कोषले आफ्नो जिम्मेवारी पूरा गर्दै जाने बताइन्।
