सिनेमा संसार
काठमाडौं
कलाकार जितु नेपालले गाईजात्राको अवसर पारेर ‘मुन्द्रेको हाँस्यव्यंग्य सामाग्री २०८२’ को पहिलो भाग सार्वजनिक गरेका छन्। ‘गाईजात्रे बजेट भाषण’ शीर्षकको यो भाग मंगलबार युट्युब च्यानल ‘जितु कमेडी’, टिकटक र अन्य डिजिटल प्लेटफर्ममार्फत सार्वजनिक गरिएको हो।
यस प्रस्तुतीमा संसद् भवनमा देखिने दृश्य, मन्त्रीको बजेट भाषण र त्यसप्रति सांसदहरूको प्रतिक्रिया मार्फत राजनीतिक व्यंग्य प्रस्तुत गरिएको छ। चार भागमा आउने भनिएको यो श्रृंखलाको प्रत्येक भाग चार–चार दिनको अन्तरालमा रिलिज हुने जनाइएको छ।जितु नेपालले यस वर्षको हाँस्य सामग्रीमा विशेषत: राजनीति केन्द्रमा राखिएको बताएका छन्। पहिलो भागमा बजेट भाषणमार्फत कटाक्ष गरिएको छ भने आगामी भागहरूमा राजनीतिबाट सन्यास लिने नेताको कथा, मन्त्रीहरूको अवस्था र धार्मिक-प्रहसनात्मक प्रसंग समावेश हुने उनले जनाएका छन्।गाईजात्रा नेपाली हास्यव्यंग्यको विशेष अवसर भएको उल्लेख गर्दै उनले यस पर्वको मौलिकता जोगाउन डिजिटल माध्यममार्फत सामाग्री ल्याएको बताएका छन्। यद्यपि स्टेज प्रस्तुति जस्तो प्रत्यक्ष अन्तक्रिया डिजिटल माध्यममा सम्भव नहुने हुँदा त्यो स्वाद फरक हुने उनले स्वीकारे।
सिनेमा सम्बन्धी प्रसंगमा उनले ‘परालको आगो’ सिनेमा छाडेको बताएका छन्। छायांकन दशैंमा पर्ने भएकाले आफूले समय दिन नसकेको कारणले सिनेमा छाडिएको स्पष्ट पारे। अर्कोतर्फ ‘कार्की साइँला’ भने नछाडिएको र बाढीका कारण अस्थायी रूपमा छायांकन रोकिएको मात्र भएको उनले जानकारी गराएका छन्।दीपकराज गिरीसँगको ‘पाँच पाण्डव’ सिनेमाको कथा लेखन कार्य भइरहेको र चाँडै ‘मुन्द्रेको कमेडी क्लब’ को नयाँ सिजन ल्याउने योजना पनि रहेको उनले बताएका छन्।
