सिनेमा संसार
काठमाडौं
अभिनेता सौगात मल्ल नयाँ नेपाली सिनेमा ‘मितज्यू’मा अनुबन्धित भएका छन्। बिहीबार उनी र निर्माण टोलीबीच लिखित सम्झौता भएको हो।
सिनेमाको निर्देशन अनिल बुढाले गर्नेछन्, जसले यसअघि ‘घरज्वाइँ’ र ‘आग्रे’ शीर्षकका वृत्तचित्र निर्देशन गरिसकेका छन्। ‘मितज्यू’ उनको दोस्रो कथानक चलचित्र हुने जनाइएको छ।
यस सिनेमामा दयाहाङ राई, तेरिया मगर, स्मिता लामिछानेजस्ता कलाकारहरू पहिल्यै अनुबन्ध भइसकेका छन्। अन्य कलाकारहरूको छनोट प्रक्रिया चलिरहेको छ।
कथावस्तु ‘गाउँ आएको बाटो’ सिनेमाका लेखक महेश राईले तयार पारेका छन्। सिनेमाको निर्माण जनक घर्तीमगरले गर्नेछन्, जसले ‘घरज्वाइँ’ पनि निर्माण गरेका थिए।छायांकनको जिम्मा शिशिर विशंखेले सम्हाल्नेछन्। सिनेमा जीएम मूभिज प्रोडक्सन प्रालिको ब्यानरमा बन्नेछ।‘मितज्यू’ को छायांकन मंसिर दोस्रो सातादेखि पोखरा र ढोरपाटन क्षेत्रका विभिन्न स्थानहरूमा हुने बताइएको छ। निर्माण पक्षले सिनेमा २०८२ सालको चैत २७ गते प्रदर्शन गर्ने लक्ष्य राखेको छ।
