सिनेमा संसार
काठमाडौं
दशैंको फूलपातीको अवसरमा असोज १३ गतेदेखि प्रदर्शनमा आउने फिल्म ‘माइतीघर’को प्रचारप्रसार तीव्र बनेको छ। देशभरका हलमा ठूला पोस्टर र विभिन्न स्थानमा होर्डिङबोर्ड राखिएको छ। प्रस्तुतकर्ता रोहित अधिकारीले प्रचारमा कुनै कमी नगर्ने बताएका छन्।
फिल्मको शीर्ष गीतमा नृत्य गरेर उत्कृष्ट बन्ने व्यक्ति वा समूहलाई ५ लाख रुपैयाँ नगद पुरस्कार दिने घोषणा गरिएको छ। भदौको पहिलो साता सार्वजनिक हुने गीतमा ४० सेकेन्डदेखि २ मिनेटसम्मको भिडियो बनाएर भदौ २० गतेसम्म पठाउनुपर्नेछ। सर्वाधिक भ्यूज पाउने र उत्कृष्ट कोरियोग्राफी भएको भिडियो चयन गरिनेछ।
‘बसन्त नै बस्न खोज्छ यहाँ लोलायर’ बोलको गीतमा भारतीय गायिका सञ्जिवनीको स्वर रहेको छ। असोज १२ गते उत्कृष्ट भिडियो बनाउनेको नाम घोषणा गरिने र सोही दिन पुरस्कार प्रदान गरिनेछ।
मिलन तामाङ निर्देशित फिल्ममा धीरज मगर, केदार घिमिरे, प्रकाश सपुत, उपासनासिंह ठकुरी, श्यामाश्री शेर्पा, युवराज लामा, वुद्धि तामाङ, शिशिर वाङ्देल, रजनी गुरुङ, सन्तोष शाही, फूलकुमार बमजम र संगीता थापाको अभिनय छ। रविन शेरचन र धिरज तामाङको लगानी रहेको फिल्मका कार्यकारी निर्माता ईश्वर श्रेष्ठ र निरज कटुवाल हुन् ।
