सिनेमा संसार
काठमाडौ
नेपाली सांगीतिक कार्यक्रमहरूमध्ये एक चर्चित नाम बनेको पलेँटीमा यसपटक प्रसिद्ध संगीतकार न्ह्यू बज्राचार्य प्रस्तुत हुने भएका छन्। कार्यक्रम जुलाई महिनाको अन्तिम शुक्रबार र शनिबार, अर्थात् २५ र २६ तारिख, कालिकास्थानस्थित नेपालयको ‘आर’शालामा आयोजना हुनेछ।न्ह्यू बज्राचार्यको धुनमा स्वर दिनेछिन् गायिका बानिका प्रधान। कार्यक्रमको सञ्चालन कवि तथा गीतकार विप्लव प्रतीकले गर्नेछन् भने संयोजन संगीतकार आभासले गर्ने जनाइएको छ।
न्ह्यू बज्राचार्य नेपाली संगीत क्षेत्रमा एक स्थापित नाम हुन्। उनले फूलको आँखामा, नआऊ सपनाभरि, लैजा चरी, सयथरि बाजा लगायत कैयौँ चर्चित गीतहरूमा संगीत भरिसकेका छन्। यसपटकको पलेँटीमा उनी पहिलोपटक सहभागी हुँदैछन्। कार्यक्रमबारे बोल्दै उनले पलेँटीलाई आधुनिक नेपाली संगीत र वर्तमान स्रोता बीचको एक सेतुका रूपमा लिएका छन्।
गायिका बानिका प्रधानका अनुसार, पलेँटीजस्तो प्रतिष्ठित कार्यक्रमको मञ्चमा प्रस्तुति दिन पाउनु आफूका लागि सपना पुरा भएको अनुभव हो। उनी यस कार्यक्रमका दर्शक रहँदै आएकी थिइन् र अहिले प्रस्तोता बन्न पाउनु निकै गर्वको कुरा भएको बताउँछिन्।कार्यक्रम संयोजक संगीतकार आभासले न्ह्यू बज्राचार्यजस्ता अनुभवी सर्जकलाई पलेँटीमा निम्त्याउन पाउँदा खुशी लागेको प्रतिक्रिया दिएका छन्। उनका अनुसार, पलेँटीले नेपाली संगीतमा निरन्तरता र गहिरोपन दिन अहम् भूमिका खेलेको छ।२० वर्षदेखि सञ्चालनमा रहेको पलेँटीमा यसपालीको प्रस्तुति स्मरणीय हुने विश्वास आयोजकले व्यक्त गरेका छन्। कार्यक्रममा सहभागी हुन चाहने दर्शकहरूले टिकट पलेँटीको अनलाइन प्लेटफर्मबाट खरिद गर्न सक्नेछन्।
