सिनेमा संसार मुम्बई
बलिउड अभिनेता शाहरुख खानकी छोरी सुहाना खान अलिबागमा कृषि जग्गा खरिद सम्बन्धी विवादमा परेकी छन्। महाराष्ट्र सरकारले किसानलाई खेतीपातीका लागि दिएको थाल गाउँस्थित जग्गा सुहानाले कलेक्टरको अनुमति नलिई खरिद गरेको आरोप लागेको छ।
सुहानाले मुम्बईको खोटे परिवारबाट करिब १२.९१ करोड भारुमा जग्गा किनेकी थिइन्। उनले ७७.४६ लाख रुपैयाँको स्ट्याम्प शुल्क पनि तिरेकी थिइन्। यो कारोबार सन् २०२३ मे ३० मा स्ट्यान्डर्ड चार्टर्ड बैंकमार्फत भएको हो। तर, महाराष्ट्र कृषि भूमि ऐन, १९६१ अनुसार, केवल किसान वा किसान परिवारसँग सम्बन्धित व्यक्तिले मात्र कृषि भूमि किन्न सक्ने प्रावधान छ। गैर-किसानले यस्तो जग्गा खरिद गर्न कलेक्टरको विशेष स्वीकृति लिनुपर्छ।
यस्तो अवस्थामा मुम्बई प्रहरीले सम्झौताको अनुसन्धानका लागि अलिबाग तहसीलदारबाट रिपोर्ट मागेको छ। सरकारी प्रावधानअनुसार, खरिदकर्ता र विक्रेताले दुबैजना तहसीलदार वा कलेक्टरबाट एनओसी लिनु अनिवार्य हुन्छ।
सुहानाले यसअघि द आर्चीजबाट अभिनय क्षेत्रमा डेब्यू गरेकी थिइन्। उनी चाँडै नै आफ्ना बुबा शाहरुखसँग ‘किङ’ फिल्ममा देखिने तयारीमा छिन्।
