सिनेमा संसार
काठमाडौं
नेपाली समाजमा देखिने पैसाप्रतिको मोह, पारिवारिक तनाव र सामाजिक प्रभावलाई कथानक बनाउँदै निर्माण गरिएको फिल्म ‘सिटामोल’को ट्रेलर सार्वजनिक गरिएको छ। ट्रेलरमा देखाइएको कथाले गरिबी, ऋण, बेरोजगारी र राज्यप्रति जनताको असन्तुष्टिलाई हास्य व्यंग्यको स्वरूपमा प्रस्तुत गर्छ।
फिल्मको मुख्य पात्रमा देखिएकी छन् बेनिशा हमाल, जसले आर्थिक लोभमा डुबेको एक युवतीको भूमिका निर्वाह गरेकी छन्। उनका पति बनेका छन् सौगात मल्ल, जसले अशक्त व्यक्ति तथा सम्भावित पूर्वलडाकुको भूमिका निर्वाह गरेका छन्। उनको पोशाक र चरित्रले पूर्वमाओवादी पृष्ठभूमिको संकेत गर्छ, यद्यपि स्पष्ट रुपमा कथावस्तु खुलाइएको छैन।झन्डै तीन मिनेटको ट्रेलरमा पारिवारिक द्वन्द्व, हास्यपूर्ण संवाद, सामाजिक सन्देश र राजनीतिक कटाक्ष समेटिएको छ। चलचित्रले पैसाको पछि लाग्दा एक परिवारमा कसरी तनाव सिर्जना हुन्छ भन्ने विषय उठाएको छ।फिल्मका निर्देशक राजबहादुर साने हुन्। चलचित्रमा सौगात र बेनिशाका साथै श्रीकृष्ण निरौला, जानुका विश्वकर्मा, लोकेन्द्र लेखक, भूगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई र काजल भुजेलको अभिनय रहेको छ।=
फिल्मको कथा प्रदीप भट्टाराईले लेखेका हुन् भने प्रस्तुति सिमोस सुनुवारको रहेको छ। निर्माता भूगोल कार्की र विकास जोशी हुन्। कार्यकारी निर्मातामा अप्सरा नेपाली, अजय मल्ल र कुमार केसी छन्। गंगाराम श्रेष्ठ सहनिर्माताको भूमिकामा छन्।तुलसीदेवी फिल्म प्राली र जुनतारा फिल्मस्को सहकार्यमा बनेको यो फिल्म साउन २३ गते, जनैपूर्णिमाको अवसरमा (अगस्ट ८) देशभर प्रदर्शनमा आउने तयारीमा छ।
